L-Iskola

L-Iskola tad-Drama d-Danza Malta tagħmel parti mill-Kulleġġ Mikiel Anton Vassalli fi ħdan il-Ministeru tal-Edukazzjoni.

L-Iskola tad-Drama u d-Danza Malta tipparteċpa b’mod attiv fl-edukazzjoni tat-tfal, żgħażagħ u adulti. L-iskola tinkoraġġixxi l-esplorazzjoni ta’ ideat u valuri, tinstiga l- immaġinazzjoni, tistimula l-iżvilupp intellettwali u estetika u twarrab dawk il-fruntieri kollha li jillimitaw l-iskoperta u l-innovazzjoni.

L-iskola toffri taħriġ wiesa’ u intensiv lil dawk il-membri tal-komunita li jkunu interessati f’dixxiplini teatrali f’livelli varji. Kemm jekk dwar żfin, reċtar jew anki id-disinn ta’ kostumi għall-palk jew il-kitba ta’ skritti, kwalunkwe individwu jista’ jsib xi kors adattat għall-aspirazzjonijiet partikolari tiegħu jew tagħha f’dan il-qasam. Dan hu kollu riżultat tal-ħsieb li bih wieħed iħares lejn l-aspetti kollha li għandhom x’jaqsmu mat-teatru bħala ‘ prova għall-ħajja’, kif ukoll bħala diversi ingaġġi ma’ organizzazzjonijiet oħrajn, lokali u barranin, li ma jirrekjedux biss it-talent mill-individwi involuti imma wkoll il-propju taħriġ f’varjeta ta’ ħiliet teatrali.

L-iskola tiffoka b’mod partikulari fuq:

• Il-preparazzjoni serja tal-istudent-atturi/żeffiena sabiex dawn ikunu jistgħu jakkwistaw varji tekniċi fl-arti drammatikali kemm fir-rigward ta’ forom formali kif ukoll dawk esperimentali imsejsin fuq taħriġ ta’ kwalità u kompetittivita. Mis-sena skolastika li jmiss se nkunu qegħdin nintroduċu korsijiet akkreditati mibnija minna stess fir-Reċtar u d-Drama mill-Livelli tal-MQF, 1-5.

• Il-ħiliet li permezz tagħhom individwu jista’ jifhem iktar lilu nnifsu/nnifisha kif ukoll ir-relazzjonijiet ma’ oħrajn, u dan permezz ta’ analiżi kritika ibbażata fuq esplorazzjoni drammatikali.

• It-transformazzjoni ta’ esperjenza personali fi prodott kreattiv imsejjes fuq ħsieb, ġudizzju kritika u azzjoni teatrali.

• L-iżvilupp ta’ ħiliet ta’ komunikazzjoni permezz ta’ għadd ta’ modi “drammatikali” b’tali mod li tkun assigurata l-interazzjoni mal-oħrajn.

• Il-kommunikazzjoni ta’ ideat u emozzjonijiet permezz ta’ lingwaġġ, espressjoni libera u moviment f’kuntesti reali u immaġinarji.

• Il-parteċipazzjoni fi proġetti teatrali fi ħdan il-komunita` bl-iskop ta’ żvilupp soċjali sabiex jitnaqqsu il-preġudizzji u l-esklużjoni.

Matul s-sena skolastika 2018-2019 l-iskola kellha ’l fuq minn 650 student jattendu ’l fuq minn 20 kors differenti f’dixxiplini varji tad-drama u tad-danza b’bosta minn dawn l-istudenti tagħha joqogħdu għal diversi eżamijiet differenti fl-arti performattiva bir-rata ta’ suċċess tkun dik ta’ mija fil-mija.

Fuq kollox, l-għalliem ġewwa l-Iskola tad-drama u d-Danza Malta, jgħallem, jirriċerka u jattiva programmi li joħorġu karattru eċitanti u stimulanti fil-ħajja tal-bosta studenti tagħha. Aħna kburin b’dan l-effett katalitiku marbut mad-dixxiplini teatrali, effett proklamat fit-twemmin tal-iskola u espress permezz ta’ atmosfera tfawwar bl-entużjażmu u t-talent.

Il-Viżjoni tagħna

Il-viżjoni tal-iSkola tad-Drama u d-Danza Malta, hi li tiżviluppa, fl-istudenti tagħna, il-potenzjal sħiħ, fl-oqsma artistiċi tad-drama u tad-danza.

Il-Mission Statement

Kull individwu għandu l-bżonn u l-kapaċita li joħloq u aħna nagħmlu ħilitna kollha sabiex ngħinuh jikseb suċċess fil-kreattivita tiegħu permezz tad-drama u d-danza. Nimmiraw li nilħqu dan billi nirrispettaw il-bżonnijiet individwali ta’ kull student, billi noħolqu ambjent ideali kreattiv li jieħu ħsieb dawn il-bżonnijiet individwali, filwaqt li noqogħdu attenti għall-iżvilupp soċjali, emozzjonali, fiżiku u intellettwali ta’ kull student. Nimmiraw li nagħmlu t-teatru prova tal-ħajja.

Għal dan il-għan:

Aħna nemmnu li bir-riżorsi u s-sapport meħtieġ nistgħu nikkontribwixxu biex niżviluppaw aktar u nibnu fuq il-ħiliet eżistenti sabiex noħolqu:

Ambjent eċċellenti għat-tagħlim fl-Arti Performattiva tad-Drama u d-Danza.

Skola b’ambjent skolastiku familjari, li jilqgħek, iddixxiplinat sew u attrajenti, li fih kulħadd iħossu kuntent, sigur, u jieħu gost jattendi filwaqt li jħossu liberu li jikkrea permezz tat-talenti artistiċi tiegħu.

Esperjenzi ta’ tagħlim li jkunu stimulanti, joħolqu sfida, eċitanti u kreattivi kif ukoll li jiffurmaw il-karattru tal-istudenti bi tħejjija għar-realta` tal-ħajja ta’ kuljum.

Istituzzjoni stmata bil-kbir għat-Tagħlim ta’ ħiliet fid-drama u fid-danza.